Аудан әкімінің балаларға арналған жаңа жылдық шыршасы өтті

№8 орта мектепте аудан әкімінің балаларға арналған жаңа жылдық шыршасы өтіп, оған білім беру ұйымдарының әр түрлі санаттағы оқушылары қатысты.
        Аудан әкімі Жанболат Жидеханов шараға жиналған оқушыларды Жаңа жыл мерекесімен құттықтап, жылы лебізін білдірді.
Ертегі кейіпкерлерінің киімін киген бүлдіршіндер Аяз ата мен Ақшақарды ортаға алып, ән айтып, би биледі.

         Шара соңында аудан әкімі, аудандық мәслихат төрағасы, аудан әкімінің орынбасары, бөлім, мекеме басшылары балаларға жаңа жылдық сыйлықтарды үлестірді.  Мерекелік шара бүлдіршіндерге көтеріңкі көңіл күй сыйлады.

*  * *

Аудандық Мәдениет үйінде 16 жасқа дейінгі мүгедектігі бар балаларға арналған аудан әкімінің шыршасы өтті.

       Жаңа жыл — бүлдіршіндер үшін ерекше мереке. Олардың кіршіксіз көңілдері бұл күнді ерекше күтеді. Әсем кештің басты кейіпкерлері Аяз ата мен Ақшақар да ортадан табылды. Сонымен қатар, ертегі әлеміндегі әсем көріністер, көз тартарлықтай безендірілген жасыл шырша айналасындағы ғажайыпқа толы қойылым, әнмен өріліп, әдемі кешке айналды. Балалар ән айтып, би билеп, өз өнерлерін көрсетті.

       Жаңа жылды шат көңілмен қарсы алған балалардың мерекесіне аудан әкімі Жанболат Жидеханов қатысып, бүлдіршіндерге жылы лебізі мен тілегін білдірді. Аудан әкімінің атынан балаларға тәттілер таратылды.
Шара соңында барлық қатысушы балалар мен ата-аналар атынан Ж.Жұбаниязова сөз алып, мерекелік шараны ұйымдастырушыларға алғыс айтты.

Өз тілшімізден.