Шалқар аудандық партиялық бақылау комиссиясы дәрі-дәрмек тапшылығын жою және медициналық препараттардың құнын негізсіз өсіруге жол бермеу мақсатында қаладағы дәріханаларға бақылау жұмыстарын жүргізді. Нәтижесінде, дәрілерге сұраныс азайғанына көз жеткізді.
Шалқар қаласындағы №9 дәріханада ацикловир-акос, ампицилин дәрілері шектік бағадан төмен бағамен сатылуда, ал цефтазидим, циклоферон дәрілеріне сұраныс жоқ. Дәріхана меңгерушісі Ғалия Мукбайдың айтуынша, дәрілердің барлығы Ақтөбе қаласындағы «Ақниет», «Зерде», «Аманат» қоймасынан алынады. Дәріхана бағаны негізсіз көтермеу туралы аудандық кәсіпкерлік бөлімімен екі жақты меморандум жасасқан.
«JASMIN» дәріханасындағы новокаин, парацетамол және тағы да басқа қажетті дәрілердің бағасы белгіленген мөлшерден аспайды. Қала тұрғындарынан сұраныс болмаған соң, ципрофлоксацин, реамберин дәрілері сатылымда жоқ. Дәріхана меңгерушісі Ләззат Анарова дәрі-лердің аптасына 2 рет келетінін, сұраныс болған жағдайда қажетті дәрі-лерді алдырту қиынға соқпайтынын айтты.
—Дәрі-дәрмектерді уақытында жеткізуге ешқандай кедергі жоқ, тасымал ретінде теміржол көлігін пайдаланамыз. Бағасы сатып алуымызға байланысты қойылады, дегенмен шекті мөлшерден асырмаймыз. Қазіргі кезде медициналық қолғап, бетперде мен антисептиктің 1 айға жететін қоры бар, — деді ол.
Шалқар қаласының тұрғыны, зейнеткер Азира Мекебаева «JASMIN» дәріханасының тұрақты тұтынушысы екен. Зейнеткерлікке шыққан соң көз ауруы пайда болып, 15 күн сайын систейн-ультра дәрісін алуға келеді. Ол бүгін аса қажет болмаса да, парацетамол сатып алғанын да айтты.
—Дәрілердің бағасына көңілім толады, бәрі қолжетімді. Осыдан екі-үш апта бұрын табылмаған дәрілер қазір сөрелерде толып тұр. Дәріге байланысты еш шағымымыз жоқ, — дейді зейнеткер.
Рейд барысында аудандық партиялық бақылау комиссиясының төрағасы Әлия Әбдіғапарова тұрғындарға ауруды өз бетінше емдеймін деген жалған жарнамаларға алданып қалмауды ескертеді. Дәрілерді тек медицина қызметкерінің рецепті бойынша дәріханалардан алуға кеңес береді. Карантин режимі мен санитарлық-эпидемиялық талаптардың қатаң сақталуын қадағалау партияның аудандық филиалының тікелей бақылауында болып, мониторинг жүргізу жұмыстары жалғаса бермек.
«Nur Otan» партиясы
Шалқар аудандық филиалы.