Мөңке би ауылындағы М.Тәжин атындағы орта мектепте басталған «Мәңгілік мақтан болған ұл мен қызға, данышпан Тәжин аға дара тұлға» атты апталықтың қорытындысы кең ауқымда өтті. Оған аудан әкімі Жанболат Жидеханов, Мөңке би бабаның ұрпақтары және ауыл тұрғындары қатысты. Мектепішілік мәнді шарада осы білім шаңырағына есімі берілген тұлға — партия қызметкері, тарих ғылымдарының кандидаты, профессор Мұхамбетқазы  Тәжиннің өмір жолы насихатталды. Сөз кезегінде аудан әкімі Мөңке би бабаның  қазақ қоғамындағы орнын айырықша атап, оның ұрпақтарының өнегелі жолдарын жастарға үлгі етіп, осы қорытынды шараға орайластырылған Мөңке би кітабының түрік тілінде аударылған нұсқасының тұсаукесеріне қатысушыларға жүрекжарды лебізін білдірді.

Үлкен экраннан «Мөңке би» атындағы қайырымдылық қорының төрағасы Бақытжан Баймұратұлының бейнежолдауы көрсетіліп, дала данышпаны атан-ған бабаға арналған жинақтың түрік тіліне аударылу себебі түсіндірілді.

Аудан әкімі Жанболат Жидеханов, еңбек ардагерлері Қуанышбай Әлмұратұлы, Елубай Төлепберген, Жеткерген Елемес кітаптың тұсаукесер жоралғысын жасады.

Баба ұрпақтары атынан білім саласының ардагері Қуаныш Табаналы сөз сөйлеп, бұл кітаптың түрік тіліне аударылуы — мың жылдығын болжаған Мөңкенің кемеңгерлігі әлем жұртшылығына танылуға кеңінен жолы ашылды деген сөз деп қуаттады. Тағылымды апталық барысында ардагерлер Мөңке бабаның даралық қасиеттері, Мұхамбетқазы Тәжиннің кісілік келбеті, оның ұлы, белгілі мемлекет және қоғам қайраткері Марат Тәжиннің адами болмысы хақында тұшымды ойларын ортаға салды. Мектептің өнерлі өрендері «Әулие ата», «Тәжин ағаға тағзым», «Мектеп әнұраны» сынды патриоттық әндерді шырқап, көрерменнің ықыласына бөленді.

М. БОҚАН.